| 7
Gearanan agus Giùlan |
| Staitistearachd |
| 7.1 Ann an
1997/98 rinn daoine bhon mhòr-shluagh 60 gearan an
aghaidh nam poileas, an àirde 14 bhon bhliadhna roimhe,
agus barrachd air dà uiread na h-àireimh bhon bhliadhna
roimhe sin. Ged a tha an àireamh gu math ìosal, bidh
an fheachd airson sùil gheur a chumail air gluasadan
àireimh sam bith. Bheir seo dhaibh fios air pàtranan a
nochdas agus, nas cudromaiche, cothrom leasanan
ionnsachadh, ma bhios a leithid ann, agus duilgheadasan
fhuasgladh. |
| 7.2 Thuirt
aithisg a' Chiad sgrùdaidh gu bheil "gearanan an
aghaidh Feachd-phoileas a' Chinn-a-Tuath gan rannsachadh
leis an Roinn Ghearanan agus Ceannsachaidh ann an dòigh
phroifeiseanta agus smachdail", ach rinneadh
luaidh air dà chùis air am bu chòir coimhead. |
| A' Cumail Sùil air Gearanan |
| 7.3 An
toiseach, chaidh a mhothachadh nach robh dòigh aca
aithneachadh cò na h-oifigearan a bha a' faighinn
barrachd ghearanan na càch, ach bhathas an dùil gum
biodh cothrom ann siostam faire a chur air dòigh as
dèidh dhaibh siostam coimpiutaireachd na roinne a
leasachadh. |
| Toradh an
Ath-sgrùdaidh |
| 7.4 Cha
deach siostam den t-seòrsa a dheasachadh ro àm an
Ath-sgrùdaidh, ach bha planaichean deiseil gus a' chùis
a thoirt air adhart. Chaidh innse do LSRP gu robh siostam
làimhe ga chleachdadh san eadar-ama. Tha LSRP a'
tuigsinn bhon fhianais a th'aca gur e siostam
neo-fhoirmeil a tha an-seo, nach urrainn gabhail a-steach
gearanan a thèid an rèiteachadh gu h-ionadail. Ged a
tha sinn mothachail gu bheil an àireamh ghearanan cho
beag 's gun urrainn dèiligeadh riutha le siostam
làimhe, tha sinn a' brosnachadh na feachd gus làn fheum
a dhèanamh de theicneòlas airson rannsachadh ghearanan,
gun dàil. |
| Cùram Phrìosanach |
| 7.5 Tha an
dàrna cùis a thogadh a' buntainn ri aon ghearan
shònraichte a dh'adhbhraich iomagain mu chùram
phrìosanach. Thug seo air LSRP cantainn gu robh "iomagain
orra mu chùram phrìosanach" agus gu sealladh
an ath-sgrùdadh ri mar a chaidh na ceistean seo a
làimhseachadh. |
| Toradh an
Ath-sgrùdaidh |
| 7.6 Rinneadh
tadhal air ceallan air feadh na feachd agus bha a'
mhòr-chuid aca glan agus ann an deagh òrdugh. Bha CCTV
ga chleachdadh ann an iomadh stèisean aig na cuntairean
casaid agus anns na trannsaichean cheallan. Thathas an
dùil gun toir an oifis phoileas ùr ann an Inbhir Nis
piseach air goireasan san sgìre sin le cruth nas
ùr-nodha agus dòighean-faire nas fheàrr. Ged a bha
LSRP toilichte leis na h-adhartasan seo, mhothaich iad
nach deach adhartas susbainteach sam bith a dhèanamh bho
àm a' chiad sgrùdaidh ann an trèanadh mu chòirichean
agus cùram phrìosanach. Thuirt an fheachd aig àm an
ath-sgrùdaidh gun tòisicheadh trèanadh as dèidh
dhaibh imrich a dhèanamh don Oifis Raoin ùir ann an
Inbhir Nis, ged nach robh stuth trèanaidh aca air a
dheasachadh fhathast. Ge tà, tha iomadh taobh air
obair oifigearan Feachd-phoileas a' Chinn-a-Tuath agus
dh'fhaodadh iarraidh air duine sam bith aca ùghdarras a
ghabhail airson cùram agus grèim prìosanaich aig àm
sam bith. Air an adhbhar sin, tha e cudromach gun tèid
stuth trèanaidh a dheasachadh gun dàil agus gun tèid
trèanadh ann an còirichean agus cùram phrìosanach a
thoirt do oifigearan air feadh na feachd. |
| 7.7 Air
sgàth cho sgapte 's a tha crìochan na feachd, tha
"ceallan sònraichte" ann an grunnan oifisean
air feadh Feachd-phoileas a' Chinn-a-Tuath, far am bi
prìosanaich ro bhreitheanas no fo bhinn gan cumail
greiseag, ma tha an sgìre ro fhada bho phrìosan. Goirid
ron Ath-sgrùdadh rinn Luchd-sgrùdaidh Rìoghail nam
Prìosanan sgrùdadh air na ceallan sin mar a bhios iad
a' dèanamh gach trì bliadhna. |
| 7.8 Aig àm
an Sgrùdaidh, fhuair superintendent mar dhleasdanas
deagh dhòigh-obrach ullachadh airson grèim agus cùram
phrìosanach, agus bidh ùidh aig LSRP ann an ciamar a
nì an fheachd adhartas le seo. Se pàirt cudromach de
obair nam poileas a tha an-seo agus tha e fìor
dheatamach gun toir poileasaidh agus stiùireadh buaidh
mhath air a' chùis ann an obair làitheil nam poileas.
Bhiodh e feumail nam biodh dòigh aig an fheachd air
siostam fèin-sgrùdaidh a bhith aca, no an obair a
lèirmheas a thaobh ìre. |
| |
