Luchd-sgrùdaidh Rìoghail nam Poileas Albannach

6 Obair Làitheil nam Poileas

Eucoir

6.1 Ann an 1997/98 thuit an àireamh eucoirean air a bheil cunntas 13% bhon bhliadhna roimhe, an lùghdachadh percent bu mhotha anns na feachdan Albannach air fad. Chùm an fheachd cuideachd a' fuasgladh eucoirean aig an ìre ionmholta àbhaisteach; sann a dh'fhuasgail iad 67% de na h-eucoirean a chaidh a chlàradh. Sheall na figearan eucoir aig àm an Ath-sgrùdaidh, ge tà, gur mathaid nach eil an àireamh a' tuiteam cho luath 's a bha e anns na bliadhnaichean a chaidh. Tha coltas ann gu bheil seo a' tachairt ann am badan eile de dh'Albainn cuideachd agus tha feachdan-phoileas a' cumail sùil gheur air.

Làimhseachadh Eucoir

6.2 Tha an fheachd a' sealltainn ri mar a tha iad a' làimhseachadh eucoir agus tha sgioba pròiseict ag obair gus leasachadh làimhseachadh eucoir a cho-ordanachadh air feadh na feachd. Tha Aonad Làimhseachadh Eucoir làn thìde aig Raon Rianachd Inbhir Nis mar tha agus, aig àm a' Chiad sgrùdaidh, thuirt LSRP gu robh iad "duilich nach deach amas a stèidheachadh airson obair an aonaid no measadh air dèanadas an aonaid a dhèanamh".

Toradh an Ath-sgrùdaidh

6.3 Cha deach lèirmheas a dhèanamh air Aonad Inbhir Nis agus cha robh an Luchd-sgrùdaidh Rìoghail idir cinnteach gu robh an t-Aonad a' cuideacheadh le bhith a' làimhseacheadh eucoir san sgìre ionadail a-rèir dòigh-obrach na feachd gu lèir. Bha e duilich nach robh fianais air adhartas susbainteach ann a bhith a' leantainn beachdan a' Chiad sgrùdaidh. Chaidh aonad làimhseachadh eucoir a chur air bhonn ann an Lochabar mar sgeama dearbhaidh, agus nì an sgioba pròiseict measadh air an dà aonad seo mar phàirt cudromach den obair aca. Bha grunnan raon rianachd eile a' dèanamh adhartais agus bha iad fada air an t-slighe gus làimhseachadh eucoir a leasachadh sna sgìrean aca. Tha seo, gun teagamh, a' leantainn prionnsabalan sgaoileadh ùghdarrais airson eagrachadh ghoireasan. Tha an fheachd airson gun tèid eisimpleirean de dheagh dhòighean obrach a thig bho na h-aonadan sgìreil a shìneadh a-mach air feadh na feachd.

6.4 Bha luchd-obrach anns na Raointean Rianachd bu lugha gu mòr airson prionnsabalan deagh làimhseachadh eucoir a ghabhail orra fhèin ach shaoil iad nach robh goireasan gu leòr aca gus aonadan sònraichte a chur air bhonn. Ged nach eil teagamh gu bheil duilgheadasan ann, cha bu chòir dhaibh bacadh a chur air na manaidsearan ionadail a thaobh dòighean obrach nas fheàrr a leasachadh leis na goireasan a th'aca an-dràsda. A thaobh làimhseachadh eucoir, tha LSRP a' cur air shùilean don fheachd gu bheil deagh obair làimhseachadh eucoir an urra ri fiosrachadh mu eucoir, rannsachadh pàtranan eucoir, sgaoileadh naidheachd agus dèanamh cuairtean-obrach a-rèir thargaidean sònraichte. Chan e dìreach obair rianachd a-mhàin a th' ann. Bidh ùidh aig LSRP ann an ciamar a thig làimhseachadh eucoir air adhart agus tha iad ga mheas ionmholta mar a tha an fheachd a' sìor fheuchainn ri seirbheis nas fheàrr a thabhann do dhaoine a tha fulang eucoir, ged nach eil mòran eucoir a' tachairt agus ged a tha am poileas a' fuasgladh àireamh fìor mhath dhith mar tha.

Drugaichean

6.5 Tha oifigearan ann am Feachd-phoileas a' Chinn-a-Tuath a' fàs gu math mothachail nach eil an t-astar a tha A' Ghàidhealtachd bho bhailtean mòra meadhan na h-Alba na dhìon tuilleadh bho mhalairt dhrugaichean agus eucoir co-cheangailte ri drugaichean. Tha Sguad Dhrugaichean na Feachd air grunnan iomairtean soirbheachail a ruith tron bhliadhna, agus tha e air 'obair a mheudachadh le taic bho Sguad Eucoir na h-Alba.

6.6 Thuirt aithisg a' Chiad sgrùdaidh gu robh an fheachd dol a dh'fhasdadh Oifigear-liaison Dhrugaichean anns gach Raon Rianachd, agus chaidh iarraidh gun dèidheadh lèirmheas a dhèanamh air an dreuchd ùr seo an ceann 12 mìosan.

Toradh an Ath-sgrùdaidh

6.7 Chaidh na h-oifigearan nan dreuchdan anns an Damhair 1997, agus bha an lèirmheas fhathast san amharc aig àm sgrùdadh LSRP. Bha Ceannardan nan Raointean den bheachd gu robh obair nan oifigearan seo fìor fheumail agus bhruidhinn LSRP ri grunnan aca. Bha LSRP den bheachd, ge tà, gum bu chòir gnè dreuchd nan oifigearan seo a shoilleireachadh gus am biodh iad nas dlùithe ri obair tional fiosrachaidh agus làimhseachadh eucoir. Mhothaich LSRP anns a' bhliadhna suas gu àm an sgrùdaidh, gu robh eucoir

co-cheangailte ri drugaichean air èirigh gu mòr ann an ceithir de na Raointean Rianachd, nach robh e air a dhol suas no sìos ann an dà Raon Rianachd, agus gu robh e air tuiteam gu mòr ann an dà. Tha an fheachd den bheachd gur e mar a tha iad a' stiùireadh obair phoileas a-rèir eucoir as coireach dha seo agus nach e pàtran eucoir a th'ann.

6.8 Thuirt aithisg a' Chiad sgrùdaidh gu feumadh dòighean clàraidh a leasachadh airson cùisean a' buntainn ri drugaichean gus am faigheadh an fheachd air coimeasan a dhèanamh, mar eisimpleir: "an t-eadar-dhealachadh eadar casaidean a' buntainn ri seilbh dhrugaichean agus malairt dhrugaichean an diofar eadar a bhith a' rùrach dhaoine no charbadan agus rùrach thogalaichean an uiread fiosrachaidh mu eucoir a tha a' buntainn ri drugaichean (a' gabhail a-steach fiosrachadh bho bhrathadairean) agus, a bheil an àireamh de luchd-cleachdaidh dhrugaichean clàraichte air èirigh no nach eil". Toradh an Ath-sgrùdaidh

6.9 Cha deach mòran adhartais a dhèanamh le seo, agus cha robh e na chleachdadh a bhith a' briseadh sìos àireamhan a' buntainn ri seilbh agus malairt dhrugaichean san dòigh a chaidh a mholadh. Air sgàth na h-easbhuidhe seo, tha aig oifigearan an sàs ann an obair làitheil nam poileas ri feuchainn ri ceistean dhrugaichean fhuasgladh gun dealbh iomlan aca air pàtranan eucoir ionadail no pàtranan air feadh na feachd. Tha LSRP a' clàrachadh nach deach am moladh seo a leantainn agus tha iad ag ràdh a-rithist gu bheil rannsachadh nas doimhne air àireamhan a' buntainn ri drugaichean deatamach ma tha an fheachd dol a làimhseachadh nan cùisean seo ann an dòigh phroifeiseanta.

Ath-sgrùdadh

Moladh 7

Tha LSRP a' moladh gun dèan an fheachd rannsachadh nas doimhne air àireamhan agus fiosrachadh a' buntainn ri drugaichean mar a chaidh a mholadh le LSRP cheana, gus am bi oifigearan an sàs ann an obair làitheil nam poileas nas fiosraiche sa' chùis.

Arbhartachadh Maoin

6.10 Nochd aithisg a' Chiad sgrùdaidh gu robh an fheachd gan ullachadh fhèin gus sealltainn ri arbhartachadh maoin, gus nach faigh eucoirich tairbhe bhon cuid eucoirean. Tha oifigearan a-nis air trèanadh fhaighinn san obair seo, agus chaidh ceithir rannsachaidhean mòra a dhèanamh air maoin eucoireach, agus thig iad fa chomhair na cùirte san aithghearrachd.

Fòirneart san Dachaidh

6.11 Rinneadh luaidh ann an aithisg a' Chiad sgrùdaidh air cho adhartach 's a bha an fheachd a thaobh fòirneart san dachaidh a làimhseachadh, agus gun deach sgioba pròiseict a stèidheachadh gus dòighean-obrach ionadail a leasachadh. Tha stiùireadh iomlan a-nis a' mìneachadh gu soilleir poileasaidh na feachd agus dleasdanas an luchd-obrach. Tha Oifigear-liaison Fòirneart san Dachaidh aig gach Raon Rianachd a bhios a' dèanamh cinnteach gu bheil fòirneart san dachaidh ga làimhseachadh ceart as dèidh dha bhith air a chlàradh. Tha cuid de inspectaran ionadail agus àrd inspectaran a' co-ordanachadh na h-obrach seo. Bha deagh eòlas aig na h-oifigearan ris na bhruidhinn LSRP, chan ann mhàin mu dhòighean obrach a thaobh fòirneart san dachaidh, ach mu na ceistean toinnte co-cheangailte ris. Bha grunnan iomairt air bhonn anns na Raointean Rianachd gus obair nam poileas agus obair bhuidhnean eile sa' chùis seo a thaisbeanadh.

Làraichean Eucoir

6.12 Mar as trice bidh muinntir a' Bhureau Aithneachaidh a' dol gu làrach eucoir sam bith a tha aig astar siubhail reusanta bho Inbhir Nis. Tha oifigearan CID air an trèanadh gus an obair seo a dhèanamh ann an àiteachan eile. Air taobh a-muigh nam bailtean mòra chan eil oifigearan CID pailt, agus ann an cuid de Raointean Rianachd bidh constabalan èididh a tha an sàs ann an obair làitheil nam poileas a' faighinn trèanaidh ann an rannsachadh sìmplidh aig làrach eucoir. Tha seo a' toirt seirbheis luath, èifeachdach do dhaoine a dh'fhuiling eucoir. Ann an ceàrnaidhean eile, ge tà, cha robh seo ga dhèanamh ged a bha uidheam uaireannan ann air a shon. Glè thric b'e dìth trèanaidh a b'adhbhar dha seo. Anns an sgrùdadh, chaidh a thoirt fa chomhair LSRP gun do rinn oifigearan CID aon turas 200 mìle san iomlan gu làrach eucoir, a-rèir choltais a chionn 's nach robh uidheam no trèanadh freagarrach aig na h-oifigearan ionadail. Tha LSRP den bheachd gu feum an fheachd lèirmheas a thoirt air modhan-obrach a thaobh rannsachadh làrach eucoir, gus an tèid goireasan a chleachdadh san dòigh as fheàrr.

Ceanglaichean ris a' Choimhearsnachd

6.13 Aig àm aithisg a' Chiad sgrùdaidh, nochd iomagain mun dìth adhartais ann a bhith a' leasachadh modh-obrach chunbhalach a thaobh sàbhailteachd na coimhearsnachd agus chaidh a ràdh gu feumadh ùghdarrasan ionadail seo ghabhail os làimh.

Toradh an Ath-sgrùdaidh

6.14 Tha na Roinnean Casg Eucoir agus Co-phàirteachadh Coimhearsnachd aig a' Phrìomh-oifis air tighinn còmhla fon ainm Sàbhailteachd Coimhearsnachd, a' taisbeanadh gu bheil dòigh smaoineachaidh nas farsaing aig an fheachd sa' chùis seo. Tha Oifigearan Sàbhailteachd Coimhearsnachd ionadail a-nis air an deagh stèidheachadh sna Raointean Rianachd. Tha inspectar air a bhith ag obair an co-bhonn le Comhairle na Gàidhealtachd bhon Òg-mhìos 1998 gan cuideachadh a' leasachadh sàbhailteachd na coimhearsnachd. Chaidh òraidean a libhrigeadh do chomataidhean sgìre agus sgiobaidhean riaghlaidh an ùghdarrais ionadail agus, san Damhair 1998, chuir Comhairle na Gàidhealtachd an Roi-innleachd aca air Sàbhailteachd na Coimhearsnachd air bhog. Rinneadh adhartas math cuideachd ann an ceanglaichean a thoirt gu bith eadar an Roinn Planaidh agus Oifigear-liaison Ailtireachd na Feachd a thaobh a bhith a' dealbhadh dhòighean gus eucoir a bhacadh.

6.15 Choinnich Iar Neach-sgrùdaidh na Feachd-phoileas le riochdairean bho na comhairlean eile ann an crìochan na feachd far a bheil sàbhailteachd na coimhearsnachd ga leasachadh le iomadh buidheann ag obair còmhla. Tha LSRP a' brosnachadh gach buidhne dèanamh cinnteach gun tèid an co-obrachadh seo a chumail suas. Tha seo air a dhèanamh ann an cuid de fheachdan-phoileas, le bhith a' sònrachadh pàirt de thabhartas an riaghaltais air a shon, agus dh'fhaodadh feachd-phoileas a' Chinn-a-Tuath beachdachadh air seo. (Faic Caibideil 3)

6.16 Rinneadh luaidh ann an Caibideil 2 air "Trì Sreathan Eagrachaidh ann an Sireadh Bheachdan na Coimhearsnachd", a chuir air bhonn dè na h-ìrean aig am bu chòir ceanglaichean a bhith eadar am poileas agus buidhnean ionadail. Bha fìor dheagh bheachd aig a h-uile h-oifigear ùghdarras ionadail agus comhairliche ionadail ris na bhruidhinn LSRP anns an sgrùdadh, mu cho cuideachail 's a bha na poileis agus buidhnean-riaghlaidh raointean, agus mu an giùlan nan obair làitheil. Shaoil LSRP ge tà, gu robh a' mhòr-chuid den cheangal eadar am poileas agus na h-ùghdarrasan tro na comhairlichean air Co-chomataidh nam Poileas an àite tro riochdairean an ùghdarrais air fad. Dh'fhaodadh gu bheil Aithisg Bhliadhnail an Àrd Chonstabail a' toirt taic dhan a' chleachdadh seo le bhith ag ràdh gu bheil Ceannardan nan Raointean "gam brosnachadh a bhruidhinn ri buill ionadail na Co-chomataidh gus dèanamh cinnteach gu bheil am poileas a' freagradh riutha." Tha pàipear na feachd air Co-luadair ann an Trì Sreathan ag ràdh gu bheil sireadh bheachdan aig ìre nan raointean a' gabhail a-steach an "Ùghdarrais Ionadail". Ged a tha LSRP a' tuigse an eadar-dhealachadh eadar a bhith a' freagradh ri cuideigin agus a' sireadh am beachdan, bha fianais ann nach robh ceannardan ionadail cinnteach an robh an fheachd airson gu sireadh iad beachdan an ùghdarrais ionadail ann an dòigh structurail. Bha a' cheist seo air leth geur ann an raointean nan eileanan, aig a bheil na h-aon chrìochan ris na h-ùghdarrasan ionadail aca, agus a tha iomallach bho phrìomh-oifis na feachd le cuid de mhodhan-obrach eadar-dhealaichte. Mar thoradh air seo, bha ceanglaichean neo-fhoirmeil gan cumail leis an ùghdarras ionadail, gun clàr-gnothaich suidhichte aig na coinneamhan no cunntas ga chumail air na chaidh a ràdh aca. Ged a tha LSRP mothachail air cho feumail 's a tha an seòrsa ceangail seo tha iad den bheachd gu bheil feum air dòigh-obrach nas proifeiseanta, ann an seirbheis phoileas an latha an-diugh aig a bheil ùghdarras airson muilleanan not de airgead a' phobaill. Mholadh sinne, mar tha, gun dèanadh an fheachd soilleir gu bheil iad a' brosnachadh cheanglaichean eadar na ceannardan ionadail agus na h-ùghdarrasan ionadail, agus gum biodh conaltradh san àm ri teachd ga chumail ann an dòigh nas fhoirmeil le clàr-gnothaich agus geàrr-chunntas. Tha seo gu h-àraid cudromach ann an raointean nan eileanan.

Ath-sgrùdadh

Moladh 8

Tha LSRP a' moladh gun dèan an fheachd soilleir gu bheil iad a' brosnachadh cheanglaichean eadar na ceannardan ionadail agus na h-ùghdarrasan ionadail, agus gum bi conaltradh san àm ri teachd ga chumail ann an dòigh nas fhoirmeil le clàr-gnothaich agus geàrr-chunntas.

6.17 Chaidh aon cheist a thogail le Ùghdarrasan nan Eileanan mun ath-eagrachadh a tha san amharc air cruth na feachd-phoileas an Albainn. Bha e follaiseach gu robh iomagain orra nach biodh e na bhuannachd do na coimhearsnachdan aca. Bha iad den bheachd gu robh ath-eagrachadh ann an seirbheisean eile air adhbhrachadh gluasad ionmhais agus ghoireasan chun a' mheadhain leis na sgìrean ionadail gam fàgail falamh. Bha eagal orra nan deidheadh feachdan a chur an ceann a chèile gur e na ceàrnaidhean iomallach a dh'fhuilingeadh easbhuidh. Tha LSRP a' faireachdainn gu bheil e mar fhiachaibh orra am fìor dhragh seo a chur fa chomhair Rùnaire na Stàite. Tha LSRP a' toirt taic do phoileasaidh an Àrd Chonstabail ann a bhith a' sgaoileadh ùghdarrais airson eagrachadh ghoireasan bhon Phrìomh-oifis gu na Raointean Rianachd. Tha iad gu mòr airson gum bi ùghdarras ga chumail aig ìre ionadail agus gum bi am poileas a' freagradh do mhuinntir nan coimhearsnachdan. Ge bith dè an cruth a bhios air feachd-phoileas na h-Alba san àm ri teachd, tha LSRP den bheachd gum bu chòir dha a bhith air a stèidheachadh gu daingeann air na raointean rianachd ionadail, le fìor ùghdarras ga sgaoileadh thuca gus am bi am poileas eòlach ann an sùilean nan coimhearsnachdan ionadail agus a' freagradh dhaibh. Tha na molaidhean anns an aithisg a dheasaich sinn o chionn ghoirid air ionmhasachd nam poileas Albannach, "Credit to the Force" a' toirt taic don bheachd seo.

Trafaic

6.18 Sheall aithisg a' Chiad sgrùdaidh gu geur air Roinn an Trafaig agus cùisean a' buntainn rithe, agus dh'adhbharaich seo trì molaidhean co-cheangailte.

6.19 Moladh a' Chiad Sgrùdaidh 9

"Ma tha an fheachd dol a chumail pàirt den ùghdarras airson sàbhailteachd rothaidean, tha e ga mholadh gu faigh daoine bhon phoball na dreuchdan a tha poileis a' lìonadh an-dràsda, mar a tha a' tachairt ann am feachdan-phoileas eile."

Toradh an Ath-sgrùdaidh

6.20 Aig àm an Ath-sgrùdaidh, bha Luchd-stiùiridh na Feachd air aontachadh an dreuchd a tha sàirdseant san Roinn Trafaig a' lìonadh an-dràsda a thoirt do neach bhon phoball. A-rèir choltais bha dàil anns a' chùis a chionn 's gu robh feum air lèirmheas a dhèanamh air gnè na dreuchd. Tha sinn a' tuigsinn gu bheil sanas obrach a-nis air nochdadh airson na dreuchd seo.

6.21 Moladh a' Chiad Sgrùdaidh 10

"gun tèid luchd-obrach bhon phoball fhasdadh a nì an obair rianachd a tha poileis le dleasdanas airson camara-astair a' dèanamh an-dràsda".

Toradh an Ath-sgrùdaidh

6.22 Aig àm an Ath-sgrùdaidh bha a' Bhuidheann Chleachdairean air Stiùireadh Luchd-obrach fhathast a' beachdachadh air a' cheist seo agus cha robh coltas gu robh iad faisg air fuasgladh. Tha e coltach gu bheil an fheachd ag aontachadh ris a' phrionnsabal ach gu bheil dragh orra mu chosgaisean, agus gu bheil amharas orra gun tèid am peanasachadh fo riaghailtean maoineachais Oifis na h-Alba ma dh'fhasdas iad tuilleadh luchd-obrach bhon phoball. A dh'aindeoin seo, tha LSRP a' brosnachadh na feachd am moladh seo adhartachadh.

6.23 Rinn aithisg a' Chiad sgrùdaidh luaidh air an dìth innealan deuchainn analach eleactronaiceach a bh' ann agus bha iomagain air an luchd-sgrùdaidh gun cuireadh seo bacadh air oidheirpean na feachd air smachd a chumail air daoine a' draibheadh le deoch. Mholadh:

Moladh a' Chiad Sgrùdaidh 11

"gun tèid innealan deuchainn analach eleactronaiceach (le barantas on Riaghaltas) a sgaoileadh air feadh na feachd cho luath 's a tha iad rim faighinn"

Toradh an Ath-sgrùdaidh

6.24 Tha an fheachd an dùil gum bi na h-innealan ùra anns na h-ochd raointean rianachd san earrach 1999. Bu chòir dha seo cuideachadh mòr a thoirt do oifigearan anns an iomairt an aghaidh draibheadh le deoch agus na tubaistean rathaid a tha e ag adhbharachadh.

6.25 Ged a bha an àireamh tubaistean rathaid airson 1997/98 air a dhol sìos 1.5% bhon bhliadhna roimhe sin, gu 4073, dh'èirich an àireamh dhaoine a chaidh am marbhadh bho 36 gu 46. Bha oifigearan san Roinn Trafaig làn fhiosrach air na duilgheadasan a bha ag èirigh uair is uair agus ag adhbhrachadh thubaistean, agus rinn iad ionnsaigh air cur às dhiubh. Thuirt aithisg a' Chiad sgrùdaidh "gu feum an Roinn Trafaig barrachd beum a chur air amasan a chruthachadh gach bliadhna a tha so-dhèanta, a ghabhas tomhas agus a tha a-rèir amasan na feachd, ma tha iad dol a thoirt seachad an t-seirbheis as fheàrr".

Toradh an Ath-sgrùdaidh

6.26 Tha an fheachd a-nis air Roi-innleachd Sàbhailteachd Rathaidean a dheasachadh ach cha robh dearbhadh gun tàinig amasan no planaichean gnìomha airson Roinn an Trafaig a-mach as, agus a-rithist bha dragh air LSRP nach robh buaidh aig an t-siostam planaidh air na bha a' tachairt air na sràidean. Ann an sgìre Comhairle na Gàidhealtachd bidh iomadh buidheann, le riochdachadh bhon fheachd nam measg, a' tighinn cruinn ann am Buidheann Stiùiridh Sàbhailteachd na Coimhearsnachd a choimhead ri caochladh chuspairean mar sàbhailteachd rathaidean. Bhiodh LSRP toilichte, ge tà, modh-obrach nas structurail fhaicinn a dh'innseadh dè chuireadh iad an gnìomh airson nan amasan aca a choilionadh air na sràidean, agus clàr-ama ullachadh gus seo a thoirt gu buil. Bha neo-làthaireachd san Roinn Trafaic air sgàth tinneis agus oifigearan gan cur a dh'obair greiseag ann an roinnean eile, na dhroch bhacadh air adhartas na cuid iomairtean agus dh'fhaodadh an fheachd fiachainn ri fuasgladh a lorg air a' cheist seo.

Gunnaichean nam Poileas

6.27 Thog aithisg a' Chiad sgrùdaidh dà cheist a' buntainn ri poileis a bhith a' cleachdadh ghunnaichean. Anns a' chiad àite cha robh dòigh ann airson dèanamh cinnteach gu robh sgaoileadh cothromach, thar uairean obrach agus sgìrean, de oifigearan le cead gunna a ghiùlan, agus anns an dàrna àite bha feum aig sgioba nan gunnaichean air carbad phoileas a bha suaicheanta.

Toradh an Ath-sgrùdaidh

6.28 A-rèir na chunnaic an Luchd-sgrùdaidh Rìoghail bha ceannardan nan raointean làn fhiosrach gu feumadh iad cothromachadh de dhaoine le sgilean eadar-dhealaichte anns na sgiobannan aca, agus bha iad a' meas oifigearan aig an robh cead gunna a ghiùlan glè chudromach. Bha na ceannardan iomagaineach, ge tà, gu faodadh an suidheachadh atharrachadh gu math luath le mar a bha luchd-obrach a' gluasad gu dreuchdan ùra, agus tha LSRP den bheachd gu bheil feum air sùil a chumail bho os àird air mar a tha oifigearan le cead gunna a ghiùlan air an sgapadh air feadh na feachd. Tha sgioba san rùm stiùiridh a' sìor fhaighinn fios air cò na h-oifigearan le cead gunna a ghiùlan a tha ag obair aig aon uair agus bha iad eòlach air dè dh'fheumadh a dhèanamh nan nochdadh tachartas far an robh gunna ri chleachdadh. Bha LSRP toilichte faicinn gu robh dòighean math ann airson oifigearan le cead gunna a ghiùlan a ghairm agus gu robh na dòighean seo air an cur fo dheuchainn grunnan uair sa' bhliadhna. Tha carbad suaicheanta air a dheagh uidheamachadh a-nis aig sgioba nan gunnaichean agus tha raon-losgaidh ùr faisg air Deimhidh air a bhith feumail ann an cumail an àird sgilean proifeiseanta nan oifigearan.

Planadh airson Àm Èiginn

6.29 Moladh a' Chiad Sgrùdaidh 12

"gun ullaich an fheachd roi-innleachd airson dèiligeadh ris na meadhanan aig àm tubaiste mòire".

Toradh an Ath-sgrùdaidh

6.30 Aig àm an Ath-sgrùdaidh bhathas air adhartas math a dhèanamh san obair seo agus bha làn trèanadh air tòiseachadh. Bha Roinn Seirbheisean nam Meadhanan agus na Roinnean Planaidh airson àm Èiginn a' libhrigeadh sreath òraidean do luchd-obrach nan Raointean Rianachd. Chaidh co-labhairt air làimhseachadh nam meadhanan aig àm tubaiste mòire a chumail san Iuchar airson a h-uile h-oifigear follaiseachd agus oifigear planaidh airson àm èiginn sa' Ghàidhealtachd agus na h-Eileanan.

Teisteanasan Gunna

6.31 Ged a bha aithisg a' Chiad sgrùdaidh mothachail air an uallach obrach a bh'air an fheachd a thaobh teisteanasan gunna, rinneadh luaidh air iomagain LSRP mun "uiread teisteanasan ghunnaichean nach deach an ùrachadh ann an deagh thìde" agus mholadh:

Moladh a' Chiad Sgrùdaidh 13

"gun tèid modhan-obrach a stèidheachadh gus am bi teisteanasan agus barantasan ghunnaichean gan ùrachadh ann an tìde".

Toradh an Ath-sgrùdaidh

6.32 Chunnaic LSRP gun deach moladh a' Chiad sgrùdaidh a leantainn agus gu bheil an fheachd suas gu tìde ann a bhith ag ùrachadh teisteanasan ghunnaichean agus ghunnaichean-froise. Tha atharradh san lagh o chionn ghoirid air dà bhliadhna a thoirt do fheachdan nuair nach fheum iad a bhith a' làimhseachadh iarrtasan airson teisteanasan ùrachadh gu cunbhalach, agus bidh Feachd-phoileas a' Chinn-a-Tuath a' cleachdadh na tìde seo airson sealltainn ri mar a tha iad ag ùrachadh theisteanasan. Thig an tìde shàmhach seo gu crìch, ge tà, aig toiseach na bliadhna 2000 nuair a thòisicheas ùrachadh theisteanasan a-rithist. Tha e cudromach gum bi modhan-obrach stèidhichte aig an àm sin a nì cinnteach nach tig dàil anns an obair mar a thachair aig àm a' Chiad sgrùdaidh.

6.33 Shaoil LSRP gu faodadh na modhan-obrach a bha an fheachd a' beachdachadh stèidheachadh cur an inntinn dhaoine nach fheumadh iad càil a dhèanamh mu theisteanas ùrachadh airson suas gu cealla-deug as dèidh dha tighinn gu crìch. Tha LSRP den bheachd gu bheil seo a' ceadachadh sealbh gunna mì-laghail. Tha LSRP a' smaoineachadh gu feum an fheachd sealltainn ri seo a-rithist agus ri na ceistean lagha a dh'èireas às, gus mì-chinnt sam bith a dhubhadh às. Bu chòir don phoileasaidh ùr a bhith air a mhìneachadh gu soilleir gus nach bi oifigearan an sàs ann an obair làitheil nam poileas teagmhach mun dleasdanas. Tha lèirmheas ga thoirt air a' ghnàth-riaghailt a th' ann an-dràsda, agus tha LSRP a' brosnachadh na feachd seo a thoirt gu buil gun dàil.

Cùisean-lagha Sìobhalta

6.34 Rinn aithisg a' Chiad sgrùdaidh luaidh air an àireamh mhòr de chùisean-lagha sìobhalta a bha gan toirt a-mach an aghaidh na feachd agus nach robh "fiosrachadh man deidhinn agus mar a bha iad a' tighinn air adhart ga thoirt seachad ann an dòigh mhath, agus gu robh feum air seo a chur ceart".

Toradh an Ath-sgrùdaidh

6.35 Aig àm an Ath-sgrùdaidh, bha còmhraidhean a' dol le luchd-àrachais na feachd gus siostam rianachd nas fheàrr a dheasachadh airson sùil a chumail air mar a tha cùisean-lagha sìobhalta a' tighinn air adhart. Ged a tha LSRP mothachail gu bheil seo ga làimhseachadh thathas an dòchas gun tèid a' chùis fhuasgladh nas luaithe a-nis.

Stuth a Chaidh a Chall 's a Lorg agus Taisbeanaidhean na Cùirte

6.36 Ged a bha an fheachd a' leantainn modhan-obrach stèidhichte airson dèiligeadh ri stuth a chaidh a lorg agus taisbeanaidhean na cùirte, nochd aithisg a' Chiad sgrùdaidh easbhuidh a thaobh àiteachan-tasgaidh freagarrach agus duilgheadasan ann a bhith a' faighinn a-mach cò leis a bha an stuth a chaidh a lorg, a chionn 's nach robh siostam-clàraidh coitcheann aca. Mholadh:

Moladh a' Chiad Sgrùdaidh 14

"gum bu chòir lèirmheas a thoirt air siostaman airson dèiligeadh ri stuth a chaidh a chall 's a lorg, agus taisbeanaidhean na cùirte".

Toradh an Ath-sgrùdaidh

6.37 Aig àm an Ath-sgrùdaidh, bha aon de na Buidhnean Chleachdairean a' coimhead ris a' chùis agus bha mòran deasbuid air tachairt eadar an Aonad Seirbheis Rianachd agus na Raointean Rianachd. Tha àite-tasgaidh air a shònrachadh anns a' Phrìomh-oifis ùir airson taisbeanaidhean na cùirte a chumail gu sàbhailte agus thathas an dòchas gu lùghdaich seo na duilgheadasan le dìth àite-tasgaidh a th'aig a' Bhureau Aithneachaidh.

6.38 Tha an fheachd mothachail air na h-easbhuidhean san dòigh-rianachd aca a thaobh stuth a chaidh a chall 's a lorg, agus tha fèill mhòr air stòr-dàta coitcheann airson na feachd. Tha iad cuideachd mothachail, ge tà, gu feum beachdachadh air seo a-rèir ghoireasan agus ionmhais, ach tha na Raointean Rianachd air a bhith a' toirt lèirmheas air modhan-obrach ionadail gus dèanamh cinnteach gu bheil stèiseanan a bhios a' faighinn brath air stuth a chaidh a chall 's a lorg a' sgaoileadh fiosrachaidh dha chèile. Nuair a bha LSRP a' tadhal air Inbhir Theòrsa chaidh innse dhaibh mu thurasach Astràilianach a fhuair a chamara air ais as dèidh dha a chall "am badeigin" eadar Ullapul agus Inbhir Theòrsa.

Ceanglaichean ris na Meadhanan

6.39 Bha aithisg a' Chiad sgrùdaidh mothachail air an obair chudromach a bha manaidsear nam meadhanan a' dèanamh, ach cuideachd gur e oifigearan sna Raointean Rianachd a bha a' dèiligeadh ris na meadhanan o latha gu latha, agus nach robh trèanadh sam bith ri fhaighinn airson seo san fheachd. Mholadh:

Moladh a' Chiad Sgrùdaidh 15

" gum bu chòir pàipear poileasaidh a dheasachadh a tha a' mìneachadh obair agus dleasdanas an luchd-obrach a tha a' dèiligeadh ris na meadhanan".

Toradh an Ath-sgrùdaidh

6.40 Chuir manaidsear nam meadhanan cùrsa trèanaidh ann an sgilean mheadhanan air dòigh aig Colaisde nam Poileas Albannach, airson oifigearan à Feachd-phoileas a' Chinn-a-Tuath a-mhàin. B'e Ceannardan nan Raointean a thagh an fheadhainn a ghabh pàirt agus tha iad a-nis ag obair leis na meadhanan nan sgìrean fhèin. Bha an iomairt seo cho soirbheachail 's gu bheil cùrsa eile san amharc. Tha òraid air "gnothaichean mheadhanan" a-nis na pàirt den trèanadh airson chonstabalan nan ùine dearbhaidh, agus airson sàirdseantan agus inspectaran a tha ùr nan dreuchd. Tha prògram leantainneach a' cur oifigearan a tha an sàs ann an obair làitheil nam poileas a dh'obair greiseag aig Seirbhisean nam Meadhanan. Tha seo gan dèanamh nas mothachail air cùisean a' buntainn ris na meadhanan agus a' toirt cothroman leasachaidh dhaibh. Ach, ged a bha poileasaidh mheadhanan gu bhith deiseil, bha LSRP duilich nach deach a sgaoileadh don fheachd ro àm an Ath-sgrùdaidh.

Gnothaichean Eile

6.41 Tron sgrùdadh chaidh grunnan chuspairean a thogail le oifigearan agus luchd-taice a tha LSRP a' smaoineachadh a dh'fhaodadh beachdachadh orra. Bha a' mhòr-chuid a' buntainn ri duilgheasadan obair làitheil nam poileas ann an ceàrnaidhean iomallach.

6.42 Carbadan

Bha iomagain air oifigearan ann an ceàrnaidhean iomallach nach robh na carbadan aca freagarrach airson a bhith a' dèanamh cuairtean-obrach san droch thìde a bhios aca, agus air frith-rathaidean gu taighean tuathanais agus far nach eil rathaidean ann. Dh'innis iad mu amannan nach b'urrainn dhaibh daoine a dh'fhaodadh a bhith a' draibheadh le deoch a leantainn, agus aon turas bha aca ri iasad carbad "4 x 4" iarraidh bho neach bhon mhòr-shluagh gus an deidheadh iad a lorg boireannaich agus leanaibh a bha air seachran. Ged a tha sinn mothachail nach eil cuid de na cunntasan seo air an dearbhadh, agus nach tèid aig feachd sam bith a h-uile h-oifigear a shàsachadh a thaobh uidheim, mholadh LSRP, air sgàth cho duilich 's a tha mòran den talamh ann an crìochan na feachd, gum bu chòir dhaibh beachdachadh a-rithist air ciamar a tha carbadan "4 x 4" gan sgaoileadh.

6.43 Fònaichean Gluasaid

Air sgàth gu bheil na companaidhean fònaichean gluasaid a' libhrigeadh seirbheis nas farsainge a-nis sa' Ghàidhealtachd agus na h-Eileanan, dh'fhaodadh an fheachd smaoineachadh air na sochairean a bheireadh fònaichean den t-seòrsa do oifigearan a tha ag obair nan aonar ann an ceàrnaidhean iomallach, nan obair làitheil agus a thaobh slàinte agus sàbhailteachd. Tha seo gu h-àraid cudromach ann an ceàrnaidhean far nach bi teachdaireachd rèidio ach lag, far am biodh fònaichean gluasaid feumail nuair nach b'urrainn an rèidio a chleachdadh.

6.44 Manaidsearan a' tadhal air an Luchd-obrach

Tha an Luchd-sgrùdaidh Rìoghail a' tuigsinn nan duilgheadasan siubhail a th' aig muinntir Feachd-phoileas a' Chinn-a-Tuath (gu h-àraid as dèidh dhuinn na crìochan a shiubhal le càr, bàta agus itealan aig àm an sgrùdaidh). Ge tà, thuirt luchd-obrach ann an cuid de na stèiseanan beaga air na thadhail sinn gu robh ùine mhòr bho chunnaic iad oifigear os cionn inbhe Inspectair. Tha LSRP mothachail air an uallach a th'air manaidsearan na seirbheis san latha an-diugh, gu h-àraid nuair a tha barrachd ùghdarrais ga sgaoileadh thuca, ach tha iad den bheachd gu feum manaidsearan nan raointean a bhith a' siubhal nan crìochan aca nas trice, airson gun toir seo misneachd do na h-oifigearan a tha an sàs ann an obair làitheil nam poileas.

Co-dhùnadh

6.45 Rinneadh tadhal air na h-ochd raointean rianachd gu lèir anns an ro-sgrùdadh agus anns an sgrùdadh agus tha LSRP taingeil airson cho fosgailte, cuideachail 's a chaidh ceistean a fhreagairt, agus airson nan deasbadan onarach, fiosrach a dh'èirich asta. Bha LSRP measail air an dòigh san robh na h-oifigearan agus an sgioba-taice ag obair gu socair air an ceann fhèin agus a' gabhail orra dleasdanais a thaobh na feachd agus nan coimhearsnachdan. Ann a bhith a' dèanamh an sgrùdaidh seo fhuaras sealladh beag air an obair shònraichte a th'aig poileis sna sgìrean seo. Chan e dìreach gu bheil eadar-dhealachadh mòr san dreach tìre o cheann gu ceann ach tha diofar seòrsaichean dòighean beatha, culturan agus cànanan rin lorg cuideachd. Cha b'e amas an Ath-sgrùdaidh sealltainn ris a h-uile taobh de obair Feachd-phoileas a' Chinn-a-Tuath, ach coimhead ris na ceistean a chaidh a thogail ann an aithisg a' Chiad sgrùdaidh. Thug LSRP an àire tron sgrùdadh seo, ge tà, an uiread de thionnsgnaidhean ionadail 's a ghabh daoine orra fhèin cho math ris an obair phoileas a tha a' tachairt gu stòlta o latha gu latha. Ged a tha sinn, ann am pàirtean eile den aithisg seo, a' toirt an aire do atharrachaidhean ann an riaghladh fo cheannard ùr, bhiodh e cèarr beachd a ghabhail air obair làitheil Feachd-Phoileas a' Chinn-a-Tuath gun moladh a thoirt dha na fir sna boireannaich a tha a' frithealadh na seirbheis sin, glè thric ann an suidheachaidhean fìor iomallach agus aonranach. Tha an cuid dìchill o latha gu latha na bhonn-stèidh don obair shoirbheachail a tha Feachd-phoileas a' Chinn-a-Tuath a' toirt gu buil.