| 4
Teicneòlas Fiosrachaidh agus Conaltradh |
4.1 Tha
ùghdarras aig an Roinn Teicneòlas Fiosrachaidh (RTF)
airson ceannach, leasachadh, cumail suas agus taic a
thoirt dhan a h-uile seirbheis coimpiutair agus
conaltradh dàta san fheachd. Se manaidsear
choimpiutairean le mòran eòlais a th'ann an Ceann na
Roinne agus se luchd-taice a th'anns an sgioba gu lèir.
Tha an sgioba air a roinn ann an ceithir buidhnean le
eòlas sònraichte airson:
- Taic
- Conaltradh Dàta
- Rianachd Stòr Dàta
agus Shiostaman
- Leasachadh
|
| Tha dà
neach a bharrachd, ag obair air cùmhnant bliadhna, air
cothrom a thoirt do Mhanaidsear na Roinne a' Bhuidheann
Taice a neartachadh, airson seirbheis cuideachaidh nas
fheàrr a libhrigeadh agus airson aithneachadh tràth dè
na duilgheadasan a bhios a' nochdadh uair is uair
a-rithist. |
| 4.2 Sheall
aithisg a' Chiad sgrùdaidh gu geur air an t-seirbheis
Teicneòlas Fiosrachaidh agus mar a tha e ga riaghladh
san fheachd, agus nochd seachd puingean sa' mholadh da
rèir: |
| Cruth Riaghlaidh |
| 4.3 Moladh
a' Chiad Sgrùdaidh 5 |
| Puing 1 |
| "Bu
chòir lèirmheas a dhèanamh air inbhe a'
mhanaidseir" |
| Toradh an
Ath-sgrùdaidh |
| 4.4 Bha e na
adhbhar iomagain ann an aithisg a' Chiad sgrùdaidh nach
robh dlùth cheangal eadar Manaidsear Roinn an
Teicneòlas Fiosrachaidh agus Luchd-stiùiridh na Feachd,
agus gur e ceannard a' Mhanaidseir an Superintendent a
bha an urra ri Seirbheisean Riaghlaidh. Thuirt an
Luchd-sgrùdaidh Rìoghail gum bu chòir "inbhe
a' Mhanaidsear Choimpiutairean a bhith aig an aon ìre ri
àrd luchd-obrach eile bho taobh a-muigh na feachd.
Leigeadh seo dhan fheachd an t-eòlas proifeiseanta aige
a chleachdadh nuair a thathas a' breithneachadh air
poileasaidh". Chaidh na Buidhnean Taice anns a'
Phrìomh-oifis ath-eagrachadh agus tha an Roinn
Teicneòlas Fiosrachaidh suidhichte ann an Aonad na
Seirbheis Dèanadais, agus, ged nach eil am Manaidsear
Choimpiutairean ann am Buidheann Coimhairleacheadh an
Luchd-stiùiridh no air Fòram a' Phoileasaidh, tha
fianais ann gu bheil ceangal nas fheàrr aige ri
Luchd-stiùiridh na Feachd agus gu bheil barrachd luaich
ga chur air an eòlas phroifeiseanta aige. Tha LSRP
den bheachd, ge tà, gum bu chòir an suidheachadh seo a
lèirmheas, a-rèir moladh a' Chiad sgrùdaidh, air
sgàth cho cudromach 's a tha Teicneòlas Fiosrachaidh
anns a' phoileas. |
| Ath-sgrùdadh |
| Moladh 3 |
| Tha LSRP a' moladh gum bu chòir an cruth
riaghlaidh ann an Roinn an Teicneòlas Fiosrachaidh a
lèirmheas, agus bu chòir an fheachd beachdachadh air
inbhe a' Mhanaidsear Choimpiutairean a thogail gu ìre an
àrd luchd-taice eile. |
| IMPACT |
| 4.5 Moladh
a' Chiad Sgrùdaidh 5 |
| Puing 2 |
| "Bu
chòir lèirmheas a dhèanamh air tairbhe an t-siostaim
IMPACT" |
| Toradh an
Ath-sgrùdaidh |
| 4.6 Se
IMPACT am prìomh shiostam stòr-dàta a th'air an lìon
choimpiutair air feadh na feachd, agus bidh e a' buntainn
ri obair mar clàradh thachartasan, agus clàradh agus
aithris eucoir. Se inneal fìor chudthromach a th'ann
airson fiosrachadh a chumail ri muinntir na feachd mu dè
tha a' tachairt as ùr. Tha seo air leth suimeil ann am
feachd le crìochan cho farsaing. Bhruidhinn aithisg a'
Chiad sgrùdaidh mu cho "slaodach 's a bha e agus an
uiread ùine gun fheum a bh'aige". |
| 4.7 Dh'aontaich
an RTF le seo agus tha iad air an t-siostam a leasachadh
gu math, a' gearradh na h-ùine gun fheum gu mòr. Ged a
tha luchd-obrach a tha an sàs ann an obair làitheil nam
poileas fhathast air am bacadh leis, fhuair LSRP gu robh
iad an ìre mhath toilichte agus mothachail air a'
phiseach a bh'air tighinn air. |
| Roi-innleachd |
| 4.8 Moladh
a' Chiad Sgrùdaidh 5 |
| Puing 3 |
| "Bu
chòir roi-innleachd Siostaman Fiosrachaidh/Teicneòlas
Fiosrachaidh a tha a' leantainn Roi-innleachd Corpaichte
na Feachd ullachadh cho luath 's a ghabhas, gus am
faighear air plana gnìomhachais na roinne, agus na
cosgaisean na luib, a dhèanamh." |
| Toradh an
Ath-sgrùdaidh |
| 4.9
Dh'aontaich aithisg a' Chiad sgrùdaidh gum biodh e
do-dhèanta roi-innleachd Siostaman Fiosrachaidh/ |
| Teicneòlas
Fiosrachaidh a dheasachadh as aonais roi-innleachd
corpaichte na feachd. Tha an aithisg ag ràdh nach
urrainn "roi-innleachd Siostaman Fiosrachaidh/ |
| Teicneòlas
Fiosrachaidh no Plana Gnìomhachais na Roinne a
dheasachadh mus bi feuman gnìomhachais na feachd air am
mìneachadh". |
| 4.10 Mar a
chaidh a luaidh ann an Caibideil 2, cha deach am pàipear
air roi-innleachd corpaichte na feachd "Policing
with Purpose" fhoillseachadh gu Sultain 1998, agus
chuir an dàil seo maill air ullachadh agus foillseachadh
roi-innleachd Siostaman Fiosrachaidh/Teicneòlas
Fiosrachaidh. Chan eil dùil gum bi sin deiseil gu
deireadh a' Mhàirt 1999. 'S dòcha, ge tà, nach robh an
dàil cho dona 's a dh'fhaodadh e a bhith, oir tha an
fheachd air a bhith a' leantainn prionnsabalan
Roi-innleachd Siostaman Fiosrachaidh nam Poileas
Albannach, a tha ag amas air siostam modularach a
chruthachadh a cheanglas na feachdan Albannach uile.
Chaidh co-dhùnaidhean air poileasaidh Teicneòlas
Fiosrachaidh a dhèanamh nuair a bhathas a' togail
Prìomh-oifis ùr na Feachd. Ach, a chionn 's nach
deach plana roi-innleachdach airson Siostaman
Fiosrachaidh/Teicneòlas Fiosrachaidh fhoillseachadh,
chan eil leabhar stiùiridh ann airson Roinn an
Teicneòlas Fiosrachaidh a bheir comhairle dhaibh nuair a
bhios iad a' beachdachadh air molaidhean ùra a chur an
gnìomh. Mholadh LSRP gun ullaicheadh an fheachd
roi-innleachd Siostaman Fiosrachaidh gun dàil. |
| Cùmhnantan |
| 4.11 Moladh
a' Chiad Sgrùdaidh 5 |
| Puing 4 |
| "Se
muinntir na feachd fhèin, no feadhainn a dh'ainmicheas
an fheachd, a bu chòir cùmhnantan càraidh agus
solarachaidh a sgrìobhadh agus a dhearbhadh a thaobh
luach, agus chan e an fheadhainn a tha a' toirt seachad
nan seirbheisean." |
| Toradh an
Ath-sgrùdaidh |
| 4.12 Tha
fios aig an RTF gu bheil feum air luach sheirbhisean agus
solarachaidh a dhearbhadh, agus tha iad air a bhith ag
obair gu dlùth le Sgioba Roi-innleachd Siostaman
Fiosrachaidh/Teicneòlas Fiosrachaidh na h-Alba a
dh'fhaighinn cuideachaidh le seo. Tha an fheachd
cuideachd air Manaidsear Chùmhnantan agus Solarachaidh
fhasdadh a tha an sàs ann an cùmhnantan càraidh agus
solarachaidh a sgrìobhadh còmhla ris an Roinn
Teicneòlas fiosrachaidh. Tha a h-uile coltas gur e ceum
air adhart airson na feachd tha seo. |
| Tèarainnteachd Teicneòlais |
| 4.13 Moladh
a' Chiad Sgrùdaidh 5 |
| Puing 5 |
| "Bu
chòir làn lèirmheas air tèarainnteachd teicneòlais a
dhèanamh" |
| Toradh an
Ath-sgrùdaidh |
| 4.14 Tha
an fheachd mothachail gu feum seo a thoirt air adhart ach
cha b'urrainn dhaibh daoine is tìde a shaoradh gus an
obair a thoirt gu crìch. Tha adhartas a' tachairt
ann an dà dhòigh, anns a' chiad àite, gus an siostam a
dhaingneachadh bho ionnsaigh bhon taobh a-muigh. Anns an
dàrna àite, tha iad a' co-dhùnadh cò anns an fheachd
a gheibh cead inntrigidh don t-siostam agus dè an ìre
aig am faigh iad a-steach, agus ciamar a thèid smachd a
chumail air seo. Tha iad cuideachd a' deasachadh
riaghailtean obrachaidh airson siostaman a rinn an
fheachd fhèin. Tha LSRP airson beum as ùr a chur air
cho cudthromach 's a tha an lèirmheas seo. |
| Faighinn Dàta air ais as dèidh Tubaist
Coimpiutair |
| 4.15 Moladh
a' Chiad Sgrùdaidh 5 |
| Puing 6 |
| "Bu
chòir am plana airson dàta fhaighinn air ais as dèidh
tubaist coimpiutair a lèirmheas agus a chur fo
dheuchainn." |
| Toradh an
Ath-sgrùdaidh |
| 4.16 Nochd
iomagain ann an aithisg a' Chiad sgrùdaidh mu "mar
a thèid dàta fhaighinn air ais as dèidh tubaist".
Tha an fheachd ag aontachadh gu feum am plana a
lèirmheas ach chaidh dàil a chur an seo air sgàth na
h-obrach eile a th'aig an fheachd ri dhèanamh agus a
chionn 's gum bi iad ag imrich gu Prìomh-oifis ùr a
dh'aithghearr (Màirt 1999). Tha an fheachd a'
beachdachadh air grunnan roghainnean an-dràsda. |
| Sgrùdadh air Bathar Cruaidh |
| 4.17 Moladh
a' Chiad Sgrùdaidh 5 |
| Puing 7 |
| "Bu
chòir làn sgrùdadh a dhèanamh air bathar cruaidh agus
an sgrùdadh air bathar bog a chothromachadh." |
| Toradh an
Ath-sgrùdaidh |
| 4.18 Tha
an fheachd a' dèanamh na h-obrach seo, agus aig àm an
Ath-sgrùdaidh thuirt iad gu robh iad gu bhith deiseil.
Bha an sgrùdadh aca ga dhèanamh mar phàirt den
uidheamachadh airson na Bliadhna 2000. |
| Gnothaichean Eile |
| 4.19 Dh'iarr
aithisg a' Chiad sgrùdaidh air an fheachd coimhead ri
ceistean eile cuideachd, a bha an Luchd-sgrùdaidh
Rìoghail den bheachd a bheireadh piseach air an
t-seirbheis a tha an RTF agus an Roinn Conaltraidh a'
libhrigeadh. Thuirt an aithisg "gum faodadh an
roinn tòrr a bharrachd a dhèanamh gus aire a thogail
man deidhinn fhèin san fheachd". Fhuair LSRP
a-mach gu robh am Manaidsear Choimpiutairean air
òraidean a thoirt seachad mu chùisean Teicneòlas
Fiosrachaidh a bha san amharc, ri Buidheann
Comhairleachadh an Luchd-stiùiridh agus Fòram a'
Phoileasaidh, agus gu robh e a' tadhal air na Raointean
Rianachd. Cuideachd, bha an luchd-obrach bhon RTF air na
Buidhnean Chleachdairean a chuideachadh le bhith a'
sgaoileadh fiosrachaidh air feadh na feachd. |
| 4.20
Mhothaich LSRP cuideachd gu robh an lèirmheas air
seirbheisean fòn/facs a bha aca san amharc, air
tòiseachadh. Bheir seo cothrom don fheachd buannachd
fhaighinn bho mhargadh a tha a' sìor mheudachadh. Bha
Ceannardan nan Raointean air pàirt a ghabhail ann a
bhith a' lorg stèiseanan a gheibheadh a' bhuannachd bu
mhotha bho innealan facs, agus thàinig fìor dheagh
bheachdan air ais bho oifigearan, gu h-àraid an
fheadhainn ann an ceàrnaidhean iomallach, mun phiseach a
thug am meudachadh fiosrachaidh seo air an obair
làitheil aca. |
| Prògram na Bliadhna 2000 |
| 4.21 B'e aon
chuspair nach do nochd aig àm a' Chiad sgrùdaidh, ach a
tha nas deatamaiche a-nis, dè cho ullamh 's a tha an
fheachd gu bhith dèiligeadh ris na ceistean obrach agus
teicniceach a nochdas leis a' cheum don ath linn. Tha
Feachd-phoileas a' Chinn-a-Tuath air pròiseact
structurail, riaghailteach a chur air bhonn, leis an Iar
Àrd Chonstabal sa' chathair, a stiùireas an fheachd tro
na ceistean a dh'fheumas fuasgladh. Ged nach do thòisich
am pròiseact gus an Fhaoilleach 1998, tha an fheachd ag
obair tro sia pròiseactan co-cheangailte. Bha LSRP
toilichte faicinn nach robh iad seo a' buntainn ri
ceistean teicneòlas fiosrachaidh a-mhàin ach ri
cùisean obrach san fharsaingeachd ceangailte ris a'
Bhliadhna 2000. Feumaidh an fheachd dèanamh cinnteach,
ge tà, nach tèid maill a chur air a' phrògram le cho
anmoch 's a bha iad a' tòiseachadh air, no leis an
uiread obrach eile a bha ri dhèanamh air sgrùdadh
bathair chruaidh agus lèirmheas sgrùdadh bathair bhog
(para 4.18 agus 4.18). Tha e coltach gun tig LSRP air ais
don chuspair seo ann an 1999. |
| |
