Luchd-sgrùdaidh Rìoghail nam Poileas Albannach

3 Eagrachadh Ghoireasan

3.1 Tha grunnan obraichean mar Eagrachadh Chàraichean, Togalaichean, Cùmhnantan agus Stòrasan, agus Ionmhas air an cur ri chèile ann an aonad ùr, Aonad Ionmhais agus Seilbh. Se Oifigear Ionmhais na Feachd a tha na Mhanaidsear air an Aonad Seirbheis. Bidh e a' suidhe air an Fhòram Poileasaidh agus Buidheann nan Seirbhisean Riaghlaidh agus tha e na phàirt de Bhuidheann Comhairleachadh an Luchd-stiùiridh a bhios a' freagradh don Àrd Chonstabal fhèin.

Seirbheisean Taice

3.2 Nochd aithisg a' Chiad sgrùdaidh gu robh ath-eagrachadh nan ùghdarrasan ionadail a' toirt cothrom do Àrd Chonstabalan agus Ùghdarrasan Phoileas gu bhith sealltainn ri mar a tha seirbheisean taice gan libhrigeadh gus dèanamh cinnteach gu bheil iad a' toirt seachad luach an airgid. Thuirt an aithisg gu robh e "na bhriseadh dùil, ma tha, nach deach adhartas sam bith a dhèanamh, agus gu robh seirbheisean gan libhrigeadh cheart mar a bha. Cha robh fianais gun deach dòighean eile air seirbheisean a libhrigeadh a rannsachadh gus an luach as fheàrr a thaobh airgid a lorg" agus mholadh:

Moladh a' Chiad Sgrùdaidh 3

"gum bu chòir seòl a stèidheachadh airson libhrigeadh nan Seirbhisean Taice as dèidh beachdachadh air dè tha toirt seachad an luach airgid as fheàrr".

Toradh an Ath-sgrùdaidh

3.3 Aig an àm seo tha Comhairle na Gàidhealtachd a' toirt nan seirbhisean seo don fheachd agus do Cho-chomataidh nam Poileas: Seirbheisean Ionmhais, a' cleachdadh siostam teicneòlas fiosrachaidh na Comhairle Seirbheisean Lagha Seirbheisean Rianachd do Cho-chomataidh nam Poileas Tional chàintean suidhichte.

Anns a' bhliadhna ionmhasail a chaidh chuir a' Chomhairle cosgais £198,000 air an fheachd airson nan seirbheisean seo. Chan eil a' Chomhairle a' mìneachadh gach cosgais fa leth agus mar sin se prìs choitcheann chorpaichte a bhios an fheachd a' pàigheadh. Tha an fheachd an sàs an-dràsda ann a bhith a' deasachadh Aontaidhean Ìrean Seirbheis leis a' Chomhairle a thaobh libhrigeadh sheirbheisean, agus bidh prìsean na bliadhna ionmhasail seo stèidhichte air dearbh phrìsean nan seirbheisean a chaidh a thoirt seachad. Cuidichidh seo ann a bhith a' cruthachadh siostam chosgaisean nas iomchaidh. Chaidh ceann latha 1 Giblean 1999 a stèidheachadh. Tha Aontaidhean Ìrean Seirbheis aig an fheachd mar tha, leis na ceithir comhairlean a tha na crìochan, airson togalaichean phoileas a chumail suas.

3.4 Chan eil an fheachd no co-chomataidh nam poileas air cosgais no feabhas nan Seirbheisean Taice a chur fo dheuchainn agus tha LSRP a' moladh, nuair a tha na h-Aontaidhean Ìrean Seirbheis stèidhichte, gum bu chòir dhan an fheachd dèanamh cinnteach gu bheil iad a' faighinn an luach as fheàrr a thaobh airgid bhuapa le coimeas ri slatan tomhais, measadh roghainnean no deuchainn margaidh. A thaobh Seirbheisean Thogalaichean, tha e glè choltach gur e na h-ùghdarrasan ionadail a bheir seachad an t-seirbheis as fheàrr, air sgàth cho sgapte 's a tha crìochan na feachd. Ach, bu chòir seo a bhith ga shìor lèirmheas a thaobh luach airgid, dìreach mar a tha a' tachairt leis na seirbheisean eile.

Ath-sgrùdadh

Moladh 2

Tha LSRP a' moladh nuair a tha na h-Aontaidhean Ìrean Seirbheis stèidhichte, gum bu chòir dhan an fheachd dèanamh cinnteach gu bheil iad a' faighinn an luach as fheàrr a thaobh airgid bhuapa le coimeas ri slatan tomhais, measadh roghainnean no deuchainn margaidh.

Riaghladh Ionmhais

3.5 Thog aithisg a' Chiad sgrùdaidh grunnan chuspairean eile

nach deach aontachadh le Co-chomataidh nam Poileas a thaobh riaghailtean ionmhais (para 3.2)

Toradh an Ath-sgrùdaidh

fhuaras aonta air na riaghailtean air 19 Òg-mhìos 1997

3.6 nach robh aonta foirmeil ann a thaobh ath-shònrachadh ionmhais (para 3.2)

Toradh an Ath-sgrùdaidh

tha a' Cho-chomataidh air an ùghdarras airson riaghladh ionmhas na feachd gu lèir a thoirt don Àrd Chonstabal, agus tha barrachd ath-shònrachadh ionmhais a' tachairt, a-rèir meud na feachd, na ann am feachdan Albannach eile.

3.7 gum bu chòir làn mheidheadh air luach is buannachd a dhèanamh mus cleachd an fheachd an siostam coimpiutair ùr aig Comhairle na Gàidhealtachd airson riaghladh ionmhais (para 3.7)

Toradh an Ath-sgrùdaidh

tha an fheachd fhathast an eisimeil an t-Siostaim Fiosrachadh Ionmhais aig Comhairle na Gàidhealtachd, airson na goireasan aca a riaghladh. Tha e an ìre mhath earbsach agus ceangailte ri Lìon Coimpiutair nam Poileas, gus am faighear air aithisgean a sgrìobhadh a-muigh anns na sgìrean. Tha e air a chuibhreachadh, ge tà, a chionn 's: nach eil e uidheamaichte airson na bliadhna 2000 nach eil e furasda obrachadh nach deach atharrachadh bho 1985 gun toir e ùine mhòr a' freagairt cheistean nach urrainn obair leis, mar as trice, 24 uairean a thìde san latha.

Tha an fheachd cinnteach gun toir an siostam ùr a tha Comhairle na Gàidhealtachd ag ullachadh am fiosrachadh dhaibh air riaghladh ionmhais a tha a dhìth, agus tha iad a' dol a cheannach na seirbheis seo bhon Chomhairle. A thaobh seo tha LSRP a' cur beum air na chaidh a ràdh ann am Moladh 2 mu sheirbheisean a chur fo dheuchainn, agus bu toil leotha seo fhaicinn a' tachairt leis an t-siostam ùr nuair a tha e stèidhichte.

Teachd-a-Steach

3.8 Thuirt aithisg a' Chiad sgrùdaidh cuideachd

nach robh Co-chomataidh nam Poileas a' gabhail tabhartas Oifis na h-Alba gu lèir, a tha a' pàigheadh 51% de chosgaisean obair-phoileas ionadail (para 3.10)

Toradh an Ath-sgrùdaidh

3.9 Tha cunntas bliadhnail feachd-phoileas ga shuidheachadh le Co-chomataidh nam Poileas, agus tha Rùnaire na Stàite a' pàigheadh 51% dheth seo le tabhartas-phoileas sònraichte nach tèid nas àirde na suim a tha comharraichte ro-làimh. Tha an 49% a chòrr a' tighinn bho na h-ùghdarrasan ionadail ann an crìochan na feachd, ann am pàirt bho cìs na coimhearsnachd ach a' mhòr-chuid bho thabhartas Oifis na h-Alba. Mar as trice, cha bhi Co-chomataidh Poileas a' Chinn-a-Tuath a' caitheamh an tabhartais gu lèir, agus tha iad mothachail nach eil iad a' gabhail a h-uile càil air a bheil còir aca bhon tabhartas phoileas.

3.10 Cha do ghabh a' Chomataidh mu £864 mìle den tabhartas ann an 1997/98, ged a chum iad pàirt den tabhartas airson na h-ath bhliadhna ionmhasail, a-rèir riaghailtean Oifis na h-Alba, gus stòras peinnsein mu £1m a thogail. Ach a-rithist, ann an cunntas 1998/99, cha do ghabh iad mu £1.219m den tabhartas air an robh còir aca. Chan fhaodar an t-airgead seo a chleachdadh ann an àite sam bith eile, agus se call maoineachais a th'ann a tha ag adhbhrachadh lùghdachadh seirbheis don mhòr-shluagh. Tha e ionmholta, ge tà, gu bheil luchd-riaghlaidh na feachd a' cumail ìrean-obrach àrda agus deagh-bheachd a' mhòr-shluaigh, a dh'aindeoin na h-uireasbhuidh seo. Ged a tha ionmhas na feachd fo smachd na Co-chomataidh, chanadh an Luchd-sgrùdaidh Rìoghail gu nochd ceistean ma bhios a' Cho-chomataidh a' fàgail cuid den tabhartas air a bheil còir aca, agus gur mathaid gun deidheadh an t-airgead a bharrachd a thoirt do fheachd eile.

Òrdughan-solair nan Ùghdarrasan Ionadail

3.11 Tha a h-uile h-ùghdarras ann an crìochan na feachd (sin A' Ghàidhealtachd, Arcaibh, Sealtainn agus na h-Eileanan Siar) a' pàigheadh fìor phrìs na tha seirbheis nam poileas a' cosg san sgìre aca fhèin agus co-roinn de chosgaisean na Prìomh-oifis. Chan bhi a' mhòr-chuid de fheachdan Albannach a' faighinn air ais ach tuairmse de na cosgaisean, agus tha an siostam aig Feachd-phoileas a' Chinn-a-Tuath ga mheas mar dheagh dhòigh-obrach. Anns an fharsaingeachd, bha na h-ùghdarrasan toilichte leis an t-suidheachadh, ach anns an Sgrùdadh nochd dragh ann an aon ùghdarras mun cheangal eadar cosgaisean agus an ìre seirbheis a bhathas a' faighinn. Tha LSRP mothachail gu bheil deasbad a' dol fhathast sa' chùis seo, agus tha iad an dòchas gun tigear gu rèite.

Sgaoileadh Ùghdarrais airson Eagrachadh Ghoireasan

3.12 Tha an t-Àrd Chonstabal a' làn chreidsinn ann an Sgaoileadh Ùghdarrais airson Eagrachadh Ghoireasan, agus, airson grunnan bhliadhna thathas air a bhith a' sgaoileadh ùghdarrais airson chunntasan chun na h-inbhe as ìsle a tha iomchaidh. Tha seo a' toirt a-steach seach-thìm, cosgaisean sgioba-taice agus ceannach uidheim. Thòisich an obair air sgaoileadh ùghdarrais airson eagrachadh ghoireasan ann an 1996/97, agus thathas air a bhith a' sìor mheudachadh an ùghdarrais on àm sin. An-dràsda se Luchd-stiùiridh na Feachd a chanas dè an àireamh phoileas as lugha bu chòir a bhith aig gach Aonad Seirbheis, ach faodaidh gach Ceannard Raon Rianachd cantainn cò mheud oifigear agus neach-taice a bhios aca, a-rèir na bhios ceadaichte dhaibh de dh'ionmhas.

3.13 Tha an fheachd air pròiseact a chur air bhonn airson làn sgaoileadh ùghdarrais airson eagrachadh ghoireasan a thoirt gu buil ro 1 Giblean 1999. A-measg nan cùisean air a bheil iad a' beachdachadh tha: siostam riaghladh ionmhais a thoirt seachad modail airson goireasan a roinn airson nan Raointean Rianachd ionmhas Aonadan Seirbheis na Prìomh-oifis agus Aontaidhean Ìrean Seirbheis co-cheangailte ris.

3.14 Tha an fheachd mothachail gu bheil feum trèanadh a thoirt do na Manaisdearan Aonadan Seirbheis agus Rianadairean Chunntasan uile, agus tha iad an dùil gum bi seo dèanta ro deireadh a' Ghearrain 1999. Bu chòir dhan aithisg "Credit to the Force" a dh'ullaich Coimisean nan Cunntasan an co-bhonn le LSRP a bhith feumail san obair seo.

Stòras Leasachaidh

3.15 Tha Stòras Leasachaidh £150,000 ga thogail bho chunntas ionmhais na feachd. Chan e stòras tuiteamais a th'ann idir, ach faodaidh Manaidsearan nan Aonadan Seirbheis tagradh a chur a-steach air a shon gus pròiseactan san fheachd a leasachadh. Tha e na dhòigh air pàigheadh airson iomairtean nach deach an sònrachadh nuair a bhathas a' cur a-steach tagraidhean nan cunntasan bliadhnail. Chaidh airgead bhon Stòras seo a chleachdadh gus rannsachadh poblach a dhèanamh agus clàr sealbhachd a dheasachadh, dà rud a chaidh a mholadh aig àm a' Chiad sgrùdaidh mu dheireadh.

Riaghladh Thogalaichean

3.16 Chaidh pròiseact luachachaidh a chrìochnachadh anns a' Mhàirt 1998, nuair a bha prìs £18.5m ga chur air togalaichean na Co-chomataidh - 98 stèiseanan phoileas agus 260 taighean. Air sgàth cho farsaing 's a tha criochan na feachd se ceist dhuilich a th'ann an gluasad agus suidheachadh luchd-obrach, agus thèid beachdachadh nas doimhne a dhèanamh air seo ann an caibideil Solarachadh luchd-obrach na h-aithisg seo. Tha solarachadh taighean phoileas ceangailte ris a' cuspair seo, ge tà. Tha a h-uile coltas ann gum biodh e ciallach taighean a chumail do oifigearan ann an àiteachean iomallach far nach dòcha gum biodh taighean ann rin ceannach. Tha 68 taighean phoileas ann an sgìrean Chaolas Mhoireibh far a bheil margadh math airson taighean prìobhaideach agus far a bheil a' mhòr-chuid de oifigearan deònach taighean a cheannach. Tha LSRP ag aontachadh gum bu chòir a h-uile h-oidheirp a dhèanamh gus cosgaisean a chumail a-nuas airson oifigearan agus na feachd, nuair a tha e na phoileasaidh aig an fheachd poileis a ghluasad thar astaran fada, uaireannan gu agus bho eileanan. Tha an fheachd an-dràsda a' beachdachadh air tairgse imrich a leasachadh a bheireadh cothrom taighean a reic agus a cheannach bho oifigearan a tha a' dèanamh imrich air feadh na feachd, gus gluasad a dhèanamh nas fhasa. Ged a tha LSRP mothachail gu bheil duilgheadasan lagha a' nochdadh a-thaobh an sgeama seo, tha iad ga mholadh agus iad an dòchas gun tèid dòigh dhèantach a lorg gus a thoirt gu buil ann am feachd le duilgheadasan imrich nas miosa na tha aig feachd-phoileas sam bith eile am Breatainn.

3.17 Bhruidhinn aithisg a' Chiad sgrùdaidh mu "dà thionnsgnadh ùr bhrosnachail" a bha dol a thòiseachadh. B'iad seo Prìomh-oifis ùr na Feachd a thogail far a bheil a' Phrìomh-oifis an-dràsda anns an Ràig Mhòir, agus Prìomh-oifis ùr airson Raon Rianachd Inbhir Nis. Bha an dà phròiseact a' cumail suas gu tìde agus cosgais, agus aig àm foillseachadh na h-aithisg seo, tha dùil gum bi Prìomh-oifis na Raon Rianachd air bhonn mar tha, agus gum bi Prìomh-oifis ùr na feachd deiseil anns a' Mhàirt 1999. Thadhail an Luchd-sgrùdaidh air an dà àite agus tha iad a' moladh na taice a thug a' Cho-chomataidh don dà phròiseact a bhios nan deagh bhonn-stèidh do obair-phoileas fada dhan ath linn.

Tèarainnteachd Thogalaichean

3.18 Nochd aithisg a' Chiad sgrùdaidh an t-eadar-dhealachadh a bh'ann an tèarainnteachd togalaichean phoileas eadar-dhealaichte (para 3.17) agus mholadh gum bu chòir:

Moladh a' Chiad Sgrùdaidh 4

"lèirmheas a dhèanamh air stèiseanan phoileas agus togalaichean eile a dh'fhaodadh a thighinn fo ionnsaigh".

Toradh an Ath-sgrùdaidh

3.19 Tha an fheachd air adhartas math a dhèanamh a' leantainn a' mholaidh seo agus rinn Comhairliche Ailtireachd na Feachd rannsachadh air tèarainnteachd a h-uile togalaich far a bheil obair-phoileas ga dhèanamh. Chaidh prògram leasachadh tèarainnteachd a stèidheachadh an co-bhonn le Ceannardan nan Raointean, leis na togalaichean as fheumaile gan daingneachadh an toiseach. Bha e follaiseach tron Sgrùdadh gun deach adhartas math a dhèanamh sa' chùis seo oir bha smachd aca a-nis air cò bha tighinn a-steach don mhòr-chuid de stèiseanan agus for aca air sàbhailteachd phearsanta sgiobanan nan deascaichean fàilte. Ann am feachdan eile air na thadhail LSRP, tha buill-mosglaidh gan toirt do luchd-taice a dh'fheumas obair nan aonar ann an stèiseanan. Dh'fhaodadh Feachd-phoileas a' Chinn-a-Tuath beachdachadh air seo a dhèanamh ann an suidheachaidhean iomchaidh.